Föstudagspóstur 16. október 2026

Ráðherra tók þátt strandhreinsun í blíðskaparveðri í gær. Átakið Strandhreinsun Íslands er á vegum íslenskra stjórnvalda til að hreinsa strandlengjur af plasti og öðru rusli. Ráðherra nýtti einnig tækifærið til að auglýsa alþjóðlega ráðstefnu um plastmengun í hafi sem fer fram í Hörpu dagan 20. - 22. október nk.

Ráðherra fór fyrir viðskiptasendinefnd sem Amerísk-íslenska viðskiptaráðið og Íslandsstofa skipulögðu til Minneapolis í Minnesota, Bandaríkjunum í vikunni. Tilgangur ferðarinnar var að efla viðskiptatengsl milli landanna og kynna sér starfsemi fyrirtækja í Minneapolis-borg.

Árlega friðarráðsstefnan Imagine Forum fór fram í Reykjavík á mánudaginn sl. Í tilefni þess að fjörutíu ár eru liðin frá leiðtogafundinum í Höfða var litið til fortíðar á ráðstefnunni og rætt hvaða lærdóm megi draga af þeim tómamótafundi og hvort ríki heims geti enn unnið að diplómatískum lausnum á tímum vaxandi spennu í heiminum. Ráðherra flutti opnunarávarp á ráðstefnunni.

Ráðherra fundaði með Volker Türk, mannréttindafulltrúa Sameinuðu þjóðanna, sem var staddur í vinnuferð á Íslandi og tók m.a. þátt í pallborði um stöðu mannréttinda í heiminum á friðarráðstefnunni. Einnig fundaði Þorgerður Katrín með Izumi Nakamitsu, framkvæmdastjóra afvopnunarmála hjá Sameinuðu þjóðunum. Nakamitsu var einnig stödd á Íslandi til að taka þátt í friðarráðstefnunni.

 

Martin Eyjólfsson, ráðuneytisstjóri utanríkisráðuneytisins, sótti óformlegan fund þróunarmálaráðherra ESB-ríkja í Dyflinni 8. og 9. október sl. en einnig sóttu fulltrúar og ráðherrar frá Noregi, Bretlandi og Kanada fundinn.

Svo var nóg um að vera hjá varnarmálaskrifstofu í vikunni.

Sendiráðsteymið okkar tók vel á móti Guðrúnu Karls- og Helgudóttur, Biskupi Íslands, og þýskum kollegum hennar þ.á m. Christian Stäblein, Biskupi Berlin-Brandenburg.

Í tilefni af alþjóðadegi stúlkubarnsins 11. október studdi sendiráðið okkar í Freetown, Síerra Leóne, við viðburð og samstöðugöngu gegn kynferðisofbeldi, kynfæralimlestingum, og hjónaböndum barna.

Svo er gaman að geta deilt myndbandi sem fjallar um áhrifaríkt þróunarsamvinnuverkefni á vegum Íslands og Matvælaáætlunar Sameinuðu þjóðanna í Síerra Leóne, en í dag er einmitt alþjóðlegi matvæladagurinn.

Pétur Ásgeirsson, sendiherra okkar í Kaupmannahöfn, opnaði myndlistarsýningu Elísabetar Olku At male et Digt í Næstved Kunstforening.
Svo er hægt að skoða sýningu Þórdísar Erlu Zoega, Samrými, í sendiráði Íslands þangað til 11. nóvember.

Sendiráðið okkar í Lilongwe, Malaví, stóð fyrir viðburði í tengslum við mæðradaginn í Malaví þann 15. október, þar sem boðið var upp á óformlegt samtal um móðurhlutverkið og kvenréttindi.

Spænsk-íslenska viðskiptaráðið og viðskiptaráð Mallorca stóðu í gær fyrir málþingi um sjálfbæra ferðaþjónustu í Palma höfuðborg Mallorca. Viðburðurinn var liður í dagskrá viðskiptasendinefndar frá Íslandi sem skipulögð hefur verið í samvinnu við Íslandsstofu, sendiráðið í Madríd, og Joaquín Gual ræðismann Íslands á Mallorca.

Árni Þór Sigurðsson, formaður embættismannanefndar Eystrasaltsráðsins, kynnti áherslur Íslands á formennskutímabili Íslands í ráðinu. Viðburðinn sóttu sendiherrar aðildar- og áheyrnarríkja ráðsins, auk fulltrúa Noregs í embættismannanefndinni.

Ragnar Kristjánsson, sendiherra Íslands í Noregi, sótti í vikunni fund hjá sendiráði Eistlands gagnvart Noregi þar sem samstarfsfólk frá Norðurlöndum og Eystrasaltsríkjum komu saman og ræddu við Anitu Nergaard, skrifstofustjóra öryggispólitískra málefna norska utanríkisráðuneytisins.

Sendiráð Íslands í Róm tók á móti Þórunni Sveinbjarnardóttur, forseta Alþingis, og sendinefnd Alþingis sem sótti Rómarborg heim í tilefni Evrópuráðstefnu forseta þjóðþinga (ECPP).

Farandsýningin Stockfish Journey var frumsýnd með glæsibrag á alþjóðlegu matvæla- og menningarhátíðinni Terra Madre - Salone del Gusto í Tórínó Ítalíu fyrir stuttu. Áætlað er að 45.000 - 50.000 manns hafi sótt skreiðarhjallinn!

Svo að lokum mætti einnig segja frá því að starfsfólk Héraðsdóms Reykjavíkur heimsóttu sendiráðið fyrir stuttu og fengu kynningu hjá Berglindi Bragadóttur, staðgengli sendiherra, og Giulia Marcellini, starfsmanni sendiráðsins, um verkefni og störf utanríkisþjónustunnar og sendiráðsins sjálfs. Það vildi svo til að aðili úr hópnum hafði glatað vegabréfi í ferðinni og var því brugðist skjótt við að útvega viðkomandi neyðarvegabréfi til þess að koma aðilanum heim til Íslands. Þau voru vitaskuld afar þáttklát fyrir svo skjóta þjónustu!

Heimildarmyndin Heimkoma (Return) var sýnd í kvikmyndahúsinu Victoria í Stokkhólmi í samstarfi við sendiráðið. Myndin er dæmi um árangursríkt samstarf Íslendinga og Svía á sviði kvikmyndagerðar en leikstjórar hennar eru Titti Johnson frá Svíþjóð og Helgi Felixson frá Íslandi. Þess má geta að Helgi var einn þátttakenda í sendinefnd forseta Íslands á sviði kvikmyndagerðar í ríkisheimsókn árið 2025. Myndin var upprunalega frumsýnd á kvikmyndahátíðinni Skjaldborg, þar sem hún hlaut verðlaun dómnefndar. Í Svíþjóð verður hún gerð aðgengileg á streymisveitu sænska ríkissjónvarpsins, SVT.

Elín Rósa Sigurðardóttir, sendiherra í Stokkhólmi, tók ásamt sendiherrum Noregs og Finnlands í Svíþjóð þátt í pallborðsumræðum á málþingi um menningarpólitík sem skipulagt var af fagsamtökum á sviði safna og sviðslitsta. Þar var meðal annars rætt um mikilvægi öflugs menningarstarfs fyrir bæði börn og fullorðna og áherslur stjórnvalda hvers lands í málaflokknum.

Í tilefni af sænskri útgáfu ljóðabókarinnar Mara kemur í heimsókn eftir Natöshu S. tók skáldið þátt í samtali við forleggjara sinn, Per Bergström, í embættisbústað sendiráðsins. Natasha S. er fædd í Rússlandi en hefur verið leiðandi rödd í nýrri bylgju íslenskra skálda sem fædd eru erlendis. Árið 2024 varð Natasha S. fyrsta skáldið sem ekki hefur íslensku sem móðurmál til þess að hljóta ljóðabókaverðlaunin Maístjörnuna. Útvarpsmaður Sveriges Radio var viðstaddur og tók viðtal við Natöshu sem hlusta má á hér. Þess má geta að forleggjarinn, Per Bergström hjá forlaginu Rámus, var nýverið skipaður ræðismaður Íslands í Malmö en hann hefur meðal annars gefið út fjölda bóka eftir Sjón og Eirík Örn Norðdahl.

Sendiráðið okkar í Varsjá studdi við 75 ára afmælisviðburð tungumáladeildar Jagielloniu háskóla í Krakow. Íslensk tónlist og íslenskar bókmenntir voru í fyrirrúmi á hátiðardagskránni. Friðrik Jónsson, sendiherra í Póllandi, lét sig að sjálfsögðu ekki vanta og bauð móður sinni með.

75 ára afmæli Norræna félagsins í Færeyjum var haldið nú á dögunum. Rithöfundarnir Einar Már Guðmundsson og Þórarinn Eldjárn kíktu í heimsókn auk annarra.

Það var ekki eðlilega mikil stemning á degi Leifs Eiríkssonar í Washington D.C sem sendiráð Íslands og sendiráð Noregs gagnvart Bandaríkjunum stóðu fyrir. Fólk var hvatt til þess að mæta í sínum bestu víkingafötum líkt og sjá má í myndbandinu.

Anna Jóhannsdóttir, fastafulltrúi Íslands gagnvart Sameinuðu þjóðunum í New York, skilaði atkvæði Íslands í atkvæðagreiðslu um setu ríkja í mannréttindaráði Sameinuðu þjóðanna árin 2027 - 2029.

Meira verður það ekki í bili,

Upplýsingadeild